In nomine sanctæ et individuæ Trinitatis. Notum sit omnibus tam presentibus quam etiam futuris, qualiter venit homo quidam, nomine Girbertus, presentiam domni Maioli abbatis, humiliter deprecans ut concederet ei aliquid ex rebus ecclesiæ sibi commissæ. Placuitque domno Maiolo abbati omnique congregationi Cluniensis monasterii ut aliquid ex rebus quas juris possident ei per prestaria testamentum donent: hoc est mansum unum qui dicitur a Marce; totum et integrum donamus ei ut abeat, et usque inexquisitum teneat. Donat itaque jam nominatus Girbertus Deo et sanctis apostolis ejus Petro et Paulo et monachis Cluniensis cœnobii mansum unum qui est situs in villa que vocatur Exsoddus, in tali tenore ut, quamdiu ipse vixerit, ambos jam suprascriptos mansos teneat; post decessum quoque ejus, ad jam nominatum locum et ad monachos ibi Deo militantibus revertantur, omnique anno in vestitura sextarios quatuor ex vino reddat. Postea vero qua die ille ex hoc seculo obierit, faciant quicquid facere voluerint abitatores Cluniensis monasterii, id est abendi, vendendi seu liceat commutandi in omnibus licentiam abeant, et usque inexquisitum teneant, et possideant omnia qua ille habet in villa Exsodda. S. Girberti. S. Ermengarde, matris ejus. S. Joslende, uxore Girberti. Rikardus, diaconus, subscripsit. Ugo, levita. Otgerius, sacerdos. Siefredus, indignus sacerdos. S. Teuderici, presbiteri. S. Berlionis, levite. Exmido, levita. Godrannus. Yppo, diaconus. Data per manu Duranni, diaconi, anno ab incarnatione Domini nostri Jesu Christi DCCCCLXXVIIII, indictione VII, regnande Chuonrado in Gallia.